Kuan - Kuan (Pemena)

Aras Jadi Namo

Kalak si mesera babanna nggeluh jadi kalak bayak. Kebalikenna : Namo jadi aras. Biasa ka pe ipersada : aras jadi namo, namo jadi aras. Ipake ngandingken kumalih jaman, kalak si musil jadi jore si jore salih kumesera.

Ngutkut Bagi Api Bas Segal

Ikataken kujelma si permenek, nggit ngerem-ngerem ukurna. Atena segat entah morah-morahna ibuni-bunikenna. Seh mawen-mawen dagingna kertang itindan-tindan ukurna.

Si des : ngutkut bagi batu-batu loning.

Adi pajek gara api kugapa pe rubati

Gara api pajek adi si man tanggerenken la lit. Ertina, adi mesera kal baban nggeluh, nakan man pangan la lit, kutera pe labo ieteh mehuli.

Melas pe ningen api adi la icikep labo meseng

Piga-piga erbage kesuhsahen nggeluh adi la ibahan sababna labo jumpa. Mesui gia ningen ibas tutupen, adi la lit ibahan dalan itutup, labo jelma itutup.

Bas Lau Nari Gara Api

Andingenna, si aturenna pedameken reh pegebukken maba pecah perang. Umpama bas ranan. Idilo anak beru pejoresa, kerehenna la pekenaken, tapi pegebukken, seh ranan e rontang.

Bagi Ancit, Adi Ersada Rubat, Adi Sirang Sidaramen, Emaka Inganna Jumpa Bas Gebuk Api

Andingenna, jelma jabu si rusur pejentik, rusur rubati adi ersada, tapi adi sirang sitedehen. Emaka bas kerja kesuhsahen rusur dalanna pulung, umpama kerja kepaten.

Bagi angguk-angguk pudi terang, iluh mambur la lit si ngapul

Kalak si ngandung tangis nandangi terang wari, nupung kepaten, nggit me la nai kenan apulen. Si aturna ngapul enggo munduk-munduk entah tunduh.

Iumpamaken ku jelma si kedabuhen sinanggel, tapi la lit si nami-namisa.

si des : bagi seluk sisada, la lit si nulbasisa.

Seran Mate Anak Kalak Asang Anakta

Ndeharanta anak kalak. Antusenna, suin mate ndehara asang mate anak.

Ngimbangi Amak Babo Lubang

Andingenna, kalak si mehuli kal tempa ukurna adi idah perbahanenna, kepe atena meneken.

Adi Ngalo La Rido Nggalar Nge La Rutang

Antusenna, adi la arah orat rejeki reh, la ka bo arah dalan sinanggel tangkel.

Siagengen radu mbiring, sikuningen radu megersing

Antusenna, adi sician-cianen, sipecat-pecaten, pekepar rugi, pekepar mbau. Tapi adi siajar-ajaren, sisampat-sampaten, pekepar merim, pekepar menahang.

Ajari Bancina

Ibas sada-sada pendahin entah pe sada-sada tempas kinigeluhen siakap kita la ngasup ije. Tapi adi reh maksa kecibalen, ngasup kang kepeken. Umpamana, sekalak la akapna ia ngasup erdalan ndauh. Tapi kenca terpaksa ngungsi, ku kerangaen pe ngasup kang erjujung.

si des : ajari majanna bagi tan-tan. Ajari perlako nge jelma.

Kelaling-Kelaling Bagi Bunga Abang-Abang

Antusenna: Iandingken kempak jelma si lanai erturi-turin pergeluhna. La lit teman entah kade-kade si nampati. (Kelaling-Kelaling = Kelajap-Kelajap)

Erbuat Bengket Bagi Tutup Abal-Abal

Ikuanken man kalak si pengelako pendahinna maka akapna reh beratna. Umpamana icuba erbinaga ngelepas-ngelepasken nakan, binaga rugi tangkelutang.